Kalaallit Nunaanni illumik niuerneq aammaarluni iluatsinnerliortoq!

Tusagassiuutinut nalunaarut
Ulloq: 28/08/2017

 

Ulluni makkunani tusagassiuutit atuisut marluk akornanni illumik niuerneq iluatsissimanngitsoq aammaarlutik sammivaat. Matumani pineqarpoq pisisussap pissutsit arlaqartut, tunisisup/tuniniaassisup neriorsuutaanut naapertuutinngitsut misigisimammagit.

Ajoraluartumik taamatut pisoqartarnera illuutillit illunillu pisiniat naammattooriaannaasarpaat, Kalaallit Nunaanni illunik tuniniaasarneq pillugu inatsiseqanngimmat.

Politikerit arlallit siunnersuutigereernikuuaat, inatsitigut tunngaveqalerlunilu periuseqalernissaq, assersuutigalugu Danmarkimi periuserineqartut assigalugit, tamaanimi inatsiseqarpoq pineqartut pillugit nunarsuarmi annertunerpaanut ilaasunik. Kingullermik nutarterisoqarpoq 1. januar 2015 tallimanik pingaarnertut immikkoortortaqartumik:

  1. Illunik tuniniaasartup inissisimanerata erseqqissarnera
  2. Tuniniaassinissamik suliakkiisoqarnerini tamani akisussaasumik illumik tuniniaasoqartarnissaa
  3. ”Paasissutissiivallaartoqarnera” (“Information overload”) – tunisisup pisisullu akornanni paasissutissiinerit paasiuminartuunissaat
  4. Illumik tuniniaasup akissarsiassai pillugit isumaqatigiissuteqarnissamut kiffaanngissuseqarnissaq
  5. Neqerooruteqarnermi ammasuunissaq pillugu malittarisassiornissamut periarfissiineq

Inatsisit nutaat pingaarnersaat tassaavoq illunik tuniniaassisup annertunerusunik piumasaqaateqarfiginissaa, ilaatigut qularnaarneqarluni illunik niuernerit tamarmik akisussaalluni tuniniaassisoq – Danmarkimi Erhvervsstyrelsimit akuerisaasoq – aqqutigalugu pisassasut, ilaatigullu qularnaarneqarluni tuniniaassisartutut inuutissarsiuteqartut ingerlaavartumik ilinniartuartarnissaat, tuniniaassisartutut sulisinnaassagunik.

Allatut oqaatigalugu Danmarkimi atuisut marluk akornanni illumik niueqatigiinnermi akunnermiliuttuusoqarsinnaanngilaq Danmarkimi Erhvervsstyrelsimit taamaaliornissamut akuerisaanngikkaanni.

Kalaallit Nunaanni kinaluunniit atuisut sinnerlugit illunik tuniniaarusuttoq, sassarsinnaavoq, piseqqusaarusiorluni illunillu nittarsaassillunilu tuniniaasinnaalluni – qanorluunniit tunuliaqutaqaraluaruni qanorluunniillu ilinniagaqaraluaruni, miliuunit arlallit nalinginut niunerup iluatsinnissaa iluatsinnginnissaaluunniit ernummatiginnguarnagit.

Kalaallit Nunaanni inuiaqatigiit taamaalillutillu inatsisiliortut soqutigissavaat, illunik niunernerni tamani akunnermiliuttup piumasaqaateqarfigineqarnissaa, taamaalilluni niunermi pisunut tamanut akisussaasuunissaa.

Tamanna anguneqarsinnaavoq ilinniarfimmi akuerisaasumi pisortatigoortumik ilinniagaqarnissap piumasarineratigut, tamatumani ilanngullugu illunik tuniniaasartumi misilittagalimmi minnerpaamik ukiuni marlunni sulinermik misilittagaqarnissaq.

Ilinniagaqarnissamik illunillu tuniniaasartumi misilittagalimmi sulisimanissamik piumasaqaatip saniatigut Danmarkimi tuniniaasartut neqeroorut atorsinnaasaat tassaavoq illut misissorneqarsimanissaanik aaqqissuussineq, tamatumanilu tunisisup toqqarsinnaavaa illumik piginittut paarlaanneranni sillimasernissaq, tassanilu pisisussaq pisussaaffilerneqartarpoq piumasaqaatit assingi naapertorlugit illup pisiarinissaanut.

Tamatuma tunisisoq periarfissippaa piffissap akisussaaffiup illumik tunniussinerup kingorna sivikillinissaanut. Assinganillu taamaaliornikkut pisisussaq ernummateqarani pisisinnaalluni, qularnaarneqartarmat illup ersinngitsunik kukkuneqarlunilu amigaateqarneranut aningaasartuutit akilerneqassasut.

Kiisalu Danmarkimi qitiusumi illut tamarmik nalunaarsorneqartarput, tassuunakkullu pisisussap qularnaarsinnaavaa illup pisiariniakkami allaaserinera ilumoornersoq – illup uuttuutaanut, sananeqaataanut il.il. naleqqiullugu.

Igdlo ApS suliffeqarfiuvoq illunik tuniniaasarfiusoq, Kalaallit Nunaanni ukiut 17-it sinnerlugit sulinikoq, tamatigullu illunik tuniniaasartutut ilinniarsimasumik sulisoqartuartoq. Igdlo maannakkorpiaq marlunnik ilinniarsimasunik illunik tuniniaasartoqarpoq, sulianillu suliaqartartumik sulisoqarluni, Copenhagen Business Acadamy-mi illunik tuniniaasartutut ilinniartumik.

Politikerit tungaanniit Danmarkimi Kalaallit Nunaannilu illunik tuniniaassinermut tunngatillugu atugassarititaasut pillugit paasisaqarusuttoqarpat, Iglo Kalallit Nunaanni ukiorpassuit sulinerminit misilittagaqarluarpoq. Ilisimasagut kikkunnulluunniit Kalaallit Nunaanni Danmarkimilu illunik tuniniaaneq pisinerlu pillugit paasisaqarusuttunut neqeroorutigivagut.

 

Inussiarnersumik inuulluaqqusillunga,

Ole Kielmann Hansen
Illunik tuniniaanermik ilinniarsimasoq suliffeqarfimmillu piginnittoq